ലാബ്‌ എക്സാം

ലാബ്‌ എക്സാം

             വന്നു  വന്നു  ഇപ്പൊ ഓരോ  എക്സാം  ഡ്യൂട്ടിയും ഓരോ അനുഭവമായി ... ഇന്നലെ mechanical students ന്റെ എക്സാം ആയിരുന്നു."machine  drawing "... ഓരോരുത്തര്‍ക്കും ഓരോ ചെറിയ table  ഉണ്ട്...chair ഉം.  question പേപ്പര്‍ കിട്ടിയതും എല്ലാരും വര തുടങ്ങി... നിന്നിട്ടാ വരക്കുന്നത് എല്ലാവരും.
      അപ്പോഴാ   ഒരു  വില്ലന്‍  പിന്നിലേക്ക് തിരിഞ്ഞു നോക്കി വരക്കുന്നത് കണ്ടത്... ഞാന്‍ ചാടി വീണു..."എന്താടോ അവിടെ? തനിക്ക്‌ സ്വന്തം പേപ്പറില്‍ നോക്കിയെഴുതിയാല്‍ പോരെ? കണ്ണ് കേടാക്കണോ? ഇനി താന്‍ തിരിഞ്ഞു നോക്കുന്നത് ഞാന്‍ കാണട്ടെ... തനിക്കെന്താ ഇനി ബാക്കി  എക്സാം ഒന്നും എഴുതണമെന്നു ആഗ്രഹമില്ലേ...? ഞാന്‍ ചെന്നു complaint  ചെയ്താലുണ്ടല്ലോ...തനിക്ക് ഒരു exam ഉം എഴുതാന്‍ പറ്റില്ല...കേട്ടോ..."  ഞാന്‍ സാധാരണ പറയുന്നതിനേക്കാള്‍ സ്വല്പം കൂടിപ്പോയോ... അവന്‍ ഒരു വികാരവുമില്ലാതെ എന്റെ മുഖത്ത് നോക്കി... പിന്നെ പേപ്പറില്‍ നോക്കി വരക്കാന്‍ തുടങ്ങി.
     എന്റെ കൂടെ ഡ്യൂട്ടി യിലുള്ള ടീച്ചര്‍ ‌  വന്നു പറഞ്ഞു... "അവന്‍ ഭയങ്കര KD യാ... കോളേജ് ലെ എല്ലാ തല്ലു കേസിലും ഉണ്ടാവും ഇവന്‍... ഒരു തവണ പോലീസ് അറസ്റ്റ് ചെയ്തു കൊണ്ട് പോയിട്ടുള്ളതാ.
               അറിയില്ലേ... അരുണ്‍ "...
               ഓഓഓ   അരുണ്‍...    ഇവനാണോ അത് ...
      
         ok    എന്റെ കാര്യത്തില്‍  തീരുമാനമായി...
 
          ആ ക്ഷീണം ഒന്ന് തീരുന്നതിനു മുന്‍പ്  ഇന്ന് ലാബ്‌ എക്സാം ഡ്യൂട്ടി ... വേഗം ലാബിലെത്തി work എല്ലാം ചെയ്തു വെച്ചു.എനിക്ക് HOD  യുടെ കൂടെയാ  ഡ്യൂട്ടി...  വൈവ ചോദിക്കാനുണ്ട്..  പിള്ളേരെ ചോദ്യം ചോദിച്ചു കറക്കിയതിനു ശേഷം മൂപ്പര്  എന്നോട് പറയും... "എന്തെങ്കിലും ചോദിക്കാനുണ്ടെങ്കില്‍ ചോദിച്ചോളൂ " ...അത് വരെ വെള്ളം കുടിച്ചു കൊണ്ടിരിക്കുന്ന കുട്ടി ആശ്വാസത്തോടെ എന്റെ മുഖത്തേക്ക്...അപ്പൊ എന്റെ വക 2 questions ... പാവമല്ലേ... എളുപ്പമുള്ളതു ഇട്ടു കൊടുക്കും...... അത് പോലും പറയാത്തവന്റെ മുഖം കണ്ടാല്‍ ഒന്ന് കൊടുക്കാന്‍ തോന്നും... ക്ലാസ്സില്‍ ഇവനൊക്കെ വായും പൊളിച്ചു ഇരിക്കാരുണ്ടല്ലോ...എന്ത് മനസ്സിലായിട്ടാണോ എന്തോ... അത് പോലെ വായും പൊളിച്ചു ഇവിടെയും ഇരിക്കും...
         ഓരോരുത്തരായി കയറി... ഞങ്ങള്‍ ഇരിക്കുന്ന ടേബിള്‍ ന്റെ മുകളില്‍ കുറച്ചു  ചീട്ടു  മടക്കി വെക്കും...questions ആണ്... പിള്ളേര് വന്നിട്ട് പ്രാര്‍ത്ഥിച്ചു പ്രാര്‍ത്ഥിച്ചു  ഒരു ചീട്ടു എടുക്കും...അതില്‍ ഒരു question ഉണ്ടാവും... അത് അവര്‍ ലാബില്‍  ചെയ്യണം... ചിലര്  question മാറ്റിതരണമെന്ന്   പറഞ്ഞാല്‍ 5മാര്‍ക്ക് അപ്പൊ പോയി...മാത്രമല്ല  hod യുടെ കയ്യില്‍ നിന്നു പൊരിഞ്ഞ വഴക്ക് ...

അങ്ങനെ ഓരോരുത്തരായി വന്നു ചീട്ട് എടുത്തു ഓരോ computer നടുത്തേക്ക്‌  നടന്നു പോയി ... ഒരു കുട്ടി
ചീട്ട്  എടുത്തതും തല കറങ്ങിയ പോലെ എന്നെ നോക്കി...
       "മിസ്സേ ..." ...
      "എന്തെ ? ചെയ്യാന്‍ പറ്റില്ലേ...സാറിനോട്  പറഞ്ഞോളൂ ..."
      ഞാന്‍ മെല്ലെ തടിയൂരി...
      അവന്‍ HOD യെ വിളിച്ചു ...."സര്‍ര്‍ര്‍‍ര്‍ര്‍"...
     "എന്താഡോ..." ...         HOD !
 ...   ഞാന്‍ തന്നെ കിടുങ്ങിപ്പോയി... അവന്‍ പറഞ്ഞു ..
     "ഒന്നൂല സര്‍ര്‍ര്‍‍ര്‍".....
      "ഒന്നൂലെങ്കില്‍ നേരം കളയാതെ പോയി ചെയ്യേടോ"
    പാവം ...അവന്‍ ആടി ആടി നടന്നു പോയി... എല്ലാവരും സീറ്റില്‍ ഇരുന്നു... ഞാന്‍ ചെന്നു എല്ലാരുടെയും questions verify ചെയ്തു. ചെയ്തു തുടങ്ങിക്കോളാന്‍  പറഞ്ഞു.
     keyboard ന്റെ ശബ്ദങ്ങള്‍ മാത്രം...pindrop silence ...
   ഞാന്‍ ചോദിച്ചു..."വൈവ ക്ക് വിളിക്കാറായോ സര്‍..."...
   "ഉം...തുടങ്ങാം..."
 അപ്പോഴാണ്‌  അജിയേട്ടന്‍  ചായയും കൊണ്ട് വന്നത്... canteen  ലെ ചേട്ടനാണ്...  2ചായയും പരിപ്പുവടയും ഒരു plate ഇല്‍  ടേബിള്‍ ഇല്‍ വെച്ചു... ഞാന്‍ ചായ എടുത്തു ...ഒരു സിപ്  കുടിച്ചു...
   "May I get in  ? "
 ശബ്ദം കേട്ടു ഞാന്‍ തിരിഞ്ഞു നോക്കി...
 ഓഹോ... ഇവനോ...
എന്റെ ഗുരുവായുരപ്പാ... 1 /2  മണിക്കൂര്‍  late ...ഇന്ന് കിട്ടിക്കോളും... ഇതിവന്റെ സ്ഥിരം പരിപാടിയാ. ഇന്നെങ്കിലും നേരത്തെ ഒന്ന് എഴുന്നള്ളിക്കൂടായിരുന്നോ? എനിക്ക് തന്നെ ദേഷ്യം വന്നു...പിന്നെയാണോ HOD ...
     ഞാന്‍ സര്‍ നെ നോക്കി... ചായ കുടിക്കുന്നുണ്ട്...വേറെന്തോ ആലോചിചിരിക്കുകയാ ... ഞാന്‍ അവനെ ഒന്ന് തുറിപ്പിച്ചു നോക്കി... അവന്‍ പരിഭ്രമത്തോടെ ഒന്ന് ചിരിച്ചു ... എന്തോ പറയാന്‍ ശ്രമിച്ചു.... പറയാനുള്ളത് സര്‍ നോട് പറഞ്ഞു കൊള്ളാന്‍   ഞാന്‍ ആംഗ്യം കാണിച്ചു. അവന്‍  HOD  യുടെ പിന്നില്‍ വന്നു നിന്നു...എന്നിട്ട് മുകളിലേക്ക് നോക്കി...ദൈവത്തിനെ വിളിച്ചതാവും...
എന്നിട്ട് മുന്നിലെത്തി...
നീട്ടി വിളിച്ചു...""സര്‍ര്‍ര്‍‍ര്‍ര്‍ര്‍ര്‍ര്‍................"
ശ്ശോ ...  എന്റെ ഹാര്‍ട്ട്‌  പോലും പട പടാ ഇടിക്കുന്നു... ഞാന്‍ എന്റെ സീറ്റ്‌ ഇല്‍ ഇരുന്നു .. എന്താ ഉണ്ടാവുക എന്ന് നോക്കട്ടെ...
       സര്‍ തിരിഞ്ഞു നോക്കി... . അവനെ നോക്കി...
       സര്‍ ചോദിച്ചു... "എന്ത് പറ്റി ... എന്ത് വേണം തനിക്ക്‌..?"
      "സര്‍ ... നേരം കുറച്ചു വൈകി... "
      "ok ... അതിന്‌..?"
      "അല്ല സര്‍... ഞാന്‍ എക്സാം എഴുതാന്‍ ..."
         .................... സര്‍ ഒന്ന് നോക്കി...
      "bus  break down  ആയി... പിന്നെ ഇറങ്ങി നടന്നു..." അവന്‍ പരവേശത്തോടെ പറഞ്ഞു...
എന്റെ ദൈവമേ... സ്ഥിരം number ... ഇടക്കൊക്കെ ഒന്ന് മാറ്റി പറയാന്‍ രണ്ടു ദിവസം മുന്‍പ് കൂടി ഞാന്‍ പറഞ്ഞതാ ഇവനോട്...
  സര്‍ പറഞ്ഞു... " വല്ലാതെ ബുദ്ധിമുട്ടി അല്ലെ... "
  "ഇല്ല സര്‍..."
 "ക്ഷീണമായോ തനിക്ക്‌... എക്സാം എഴുതാന്‍ ബുദ്ധിമുട്ടുണ്ടോ..."
 "ഇല്ല സര്‍..."
 "എക്സാം നു വരുമ്പോള്‍ കുറച്ചു നേരത്തെയൊക്കെ ഇറങ്ങണം... ഇങ്ങനെ കിതച്ചു കൊണ്ട് ക്ഷീണിച്ചു കയറി വന്നാല്‍ എക്സാം എങ്ങനെ എഴുതും...? ഉം...പോട്ടെ... എന്തായാലും ഒന്നെടുത്തോളൂ ... "
   ഓ ..എന്തായാലും വേണ്ടില്ല... സര്‍ നല്ല മൂഡിലാ...
അവനു ഏത്  ചീട്ടാണാവോ കിട്ടാന്‍ പോകുന്നെ... ഞാന്‍ ആലോചിച്ചു.
അവന്‍ അന്തം വിട്ടു നില്കുന്നു! ഈ ചെക്കനെന്താ... ഒരു question എടുത്തോണ്ട്  പോയി സമയം കളയാതെ ചെയ്തൂടെ?
അവന്‍ പറഞ്ഞു... "വേണ്ട സര്‍ ...."
"ഏ... വേണ്ടെന്നോ... ഒരെണ്ണം എടുക്കെടോ..."
"അയ്യോ വേണ്ട സര്‍..."
ഞാനും സര്‍ ഉം ഒന്നിച്ചു ഞെട്ടി... "അഹങ്കാരം പറയുന്നോ... " സര്‍ ആക്രോശിച്ചു...
"അയ്യോ സര്‍ ...എനിക്ക്  വേണ്ടാഞ്ഞിട്ടാ... സര്‍ നു നിര്‍ബന്ധമാണെങ്കില്‍ ഒരു കഷണം മതി..." ... അവന്‍ പരിപ്പുവട പകുതി പൊട്ടിച്ചെടുത്തു അന്തം വിട്ടു നിന്നു......